أنا مرتبطة " حوار واقعي "

لما بسال بنت متربطة بولد من ورا أهلها ..

أنا : يا حبيبتي انت ضامنه انه هيجي يتقدم ليك 

هي : اه طبعا ، ده بيحبني 

انا : طيب ايه اثبات انه بيحبك 

هي : بيكلمني ويطمني علي كل يوم ، وبيخاف علي 

انا : ايوه ما ممكن انا اكلمك واطمن عليك واخاف عليك
بس فين الاثبات أنه كراجل بيحبك الاثبات يا حبيبتي انه يحافظ عليك 

هي : ما هو بيحافظ علي فعلا 

انا : ايوه يعني مبتخرجوش سوا ، مبتتكلموش في نص الليل زي الحراميه ..

هي : اه احنا بنخرج وبنتكلم 24 ساعة

انا : وانتوا بتخرجوا ازاي هو بيحافظ عليك وبيحبك واذا يستحمل حد يشوفك معاه ويقول عليك كلمة او يبصلك نظرة مش تمام ..
 هل لو في حد بيحب فعلا هيقبل وضع زي ده ؟!!

هي : سكتت ...

انا : طيب وانتو بتتكلموا في نص الليل ووالدك دخل عليكي هيكلمك عادي ولا هيقفل السكة ويجري زي الحرامي اللي عامل عمله ..

هي : سكتت ...

أنا : خليني معاكِ للاخرهنفترض انه بيحبك وهيتقدم ليكِ ..
 انتِ معتقدة ان الله عز وجل هيساوي بينك وبين واحدة حافظت علي نفسها وبدات تحب في علاقة في النور والله عمرها ما هتحصل .. لان كل واحد فينا له رصيد من البركة ، وهو المتحكم فيه قبل زواجه لاما يسحب رصيده قبل الزواج لاما يحافظ عليه وهيلاقيه بعد الزواج في حياته .

انا : بصي يا حبيبتي ، اللي فعلا بيحب ومعجب هتلاقي بيطمن من بعيد ، بيتعب ويشتغل ويوفر علشان يجي يتقدم ، ويكلمك في النور ، ويخرج معاك في وجود اخوك وميستحملش حد يقول عليكِ كلمة لانك هتصبحي عرضه وشرفه ، يقول بصوت عالي دي خطيبتي وأم اولادي المستقبلية والدبلة تنور في ايدك ، اللي بيحب بجد هيكلمك وأهلك عارفين أن ده خطيبك وبتتكلمي وانت معاهم  ومبسوطين بعلاقتكم اللي بتكبر في النور ، اللي بيحب بيحافظ ويضحي وبيعمل كل حاجة في النور .. 
اما الحرامي اللي بيسرق بالليل باسم الحب ، ده بيتسلي يا قلبي ، ومع اول ضحية جديدة هيجري ويسيبك ..

يا حبيبتي حافظي علي نفسك ، واوع تتخدعي بكلمة اصل كل البنات مصاحبة. ، والله يا حبيبتي هيندموا لاما استهلاك لمشاعرهم في طريق غلط ، لاما وجع لقلوبهم بدون داعي ، لاما زواج بدون قلب وقلبها مع اللي كانت ماشيه معاه وحياتها الزوجية مش حاسه بيها ، غير ضياع كرامتها وكرامة أهلها اللي من أقل حقوقهم أنهم يشوفوا بنتهم في علاقة شرعية في النور ..

الصحوبية والارتباط  قبل الخطوبة محرمة ولا ترضي الله عز وجل و وجع قلب .. 

وتذكري قول الله تعالي " وَلَيْسَ الْبِرُّ بِأَن تَأْتُوا الْبُيُوتَ مِن ظُهُورِهَا وَلَٰكِنَّ الْبِرَّ مَنِ اتَّقَىٰ ۗ وَأْتُوا الْبُيُوتَ مِنْ أَبْوَابِهَا ۚ وَاتَّقُوا اللَّهَ لَعَلَّكُمْ تُفْلِحُونَ  (189)  سورة البقرة "

ابعدي فورا عن هذه العلاقة وحافظي علي قلبك وتذكري أن قلب من تحبي بيد الله عز وجل قادرعلي ان يجعله يكرهك بعدما احبك ،وتذكري أن من تعجل شي قبل اوانه عوقب بحرمانه .. 

                                  بقلم : د.الاء هشام

 استشارية العلاقات الاسرية & المدربة التحفيزية & اخصائية الموارد البشرية