أنا مرتبطة: حوار واقعي

لما بسأل بنت مرتبطة بولد من وراء أهلها:

أنا: يا حبيبتي، إنتِ ضامنة إنه هييجي يتقدم ليكِ؟

هي: أه طبعًا، ده بيحبني.

أنا: طيب، إيه إثبات إنه بيحبك؟

هي: بيكلمني ويطمّن عليّ كل يوم، وبيخاف عليّ.

أنا: أيوه، ما ممكن أنا أكلمك وأطمّن عليكِ وأخاف عليكِ، بس فين الإثبات إنه كراجل بيحبك؟ الإثبات يا حبيبتي إنه يحافظ عليكِ.

هي: ما هو بيحافظ عليّ فعلًا.

أنا: أيوه، يعني مبتخرجوش سوا؟ مبتتكلموش في نص الليل زي الحرامية؟

هي: أه، إحنا بنخرج وبنتكلم 24 ساعة.

أنا: وانتوا بتخرجوا إزاي؟ هو بيحافظ عليكِ وبيحبك، طب هيستحمل حد يشوفك معاه ويقول عليكِ كلمة أو يبصلك نظرة مش تمام؟ هل لو في حد بيحب فعلًا هيقبل وضع زي ده؟!

هي: سكتت…

أنا: طيب، وانتوا بتتكلموا في نص الليل ووالدك دخل عليكِ، هتكلمي عادي ولا هتقفلي السكة وتجري زي الحرامي اللي عامل عملته؟

هي: سكتت…

أنا: خليني معاكِ للآخر، نفترض إنه بيحبك وهيتقدم ليكِ.. إنتِ معتقدة إن الله عز وجل هيساوي بينك وبين واحدة حافظت على نفسها وبدأت تحب في علاقة في النور؟ والله عمرها ما هتحصل.. لأن كل واحد فينا له رصيد من البركة، وهو المتحكم فيه قبل زواجه، يا إما يسحب رصيده قبل الزواج، يا إما يحافظ عليه وهيلاقيه بعد الزواج في حياته.

أنا: بصّي يا حبيبتي، اللي فعلًا بيحب ومعجب هتلاقيه بيطمّن من بعيد، بيتعب ويشتغل ويوفّر علشان يجي يتقدم، ويكلمك في النور، ويخرج معاكِ في وجود أخوكِ، وميستحملش حد يقول عليكِ كلمة لأنك هتصبحي عِرضه وشرفه، يقول بصوت عالي دي خطيبتي وأم أولادي المستقبلية والدبلة تنوّر في إيدك. اللي بيحب بجد هيكلمك وأهلك عارفين إن ده خطيبك وبتتكلمي وإنتِ معاهم ومبسوطين بعلاقتكم اللي بتكبر في النور. اللي بيحب بيحافظ ويضحي وبيعمل كل حاجة في النور..

أما الحرامي اللي بيسرق بالليل باسم الحب، ده بيتسلى يا قلبي، ومع أول ضحية جديدة هيجري ويسيبك..

يا حبيبتي حافظي على نفسك، وأوعي تتخدعي بكلمة “أصل كل البنات مصاحبة”، والله يا حبيبتي هيندموا، يا إما استهلاك لمشاعرهم في طريق غلط، يا إما وجع لقلوبهم بدون داعي، يا إما زواج بدون قلب وقلبها مع اللي كانت ماشية معاه وحياتها الزوجية مش حاسة بيها، غير ضياع كرامتها وكرامة أهلها اللي من أقل حقوقهم إنهم يشوفوا بنتهم في علاقة شرعية في النور..

الصحوبية والارتباط قبل الخطوبة محرمة ولا ترضي الله عز وجل ووجع قلب..

وتذكري قول الله تعالى:

” وَلَيْسَ الْبِرُّ بِأَن تَأْتُوا الْبُيُوتَ مِن ظُهُورِهَا وَلَٰكِنَّ الْبِرَّ مَنِ اتَّقَىٰ ۗ وَأْتُوا الْبُيُوتَ مِنْ أَبْوَابِهَا ۚ وَاتَّقُوا اللَّهَ لَعَلَّكُمْ تُفْلِحُونَ ” (189) سورة البقرة

ابعدي فورًا عن هذه العلاقة وحافظي على قلبك، وتذكري أن قلب من تحبينه بيد الله عز وجل، قادر على أن يجعله يكرهك بعدما أحبك، وتذكري أن من تعجّل شيئًا قبل أوانه عوقب بحرمانه..